O Diario Oficial de Galicia publicou hoxe a resolución da convocatoria de axudas para a mellora de explotacións, incorporación de mozos á actividade agrogandeira e pequenas explotacións no 2023. Foron aprobados 875 expedientes cun orzamento total de 32,13 millóns de euros, cubrindo todas as solicitudes que cumpriron cos requisitos.
Dentro das aprobadas, 504 plans de investimentos en melloras para explotacións agrarias recibirán un importe de 19,05 millóns de euros. En canto á incorporación de mozos, 252 persoas beneficiaranse dun orzamento total de 11,29 millóns de euros. Para pequenas explotacións, 119 granxas recibirán un investimento total de 1,79 millóns de euros.
Ademais, está aberto o prazo para solicitar axudas correspondentes a 2024, cun orzamento de 47 millóns de euros, co obxectivo de mellorar a estrutura produtiva, fomentar a incorporación de mozos e persoas de entre 41 e 55 anos á actividade agraria e impulsar o desenvolvemento de pequenas explotacións, buscando así mellorar a competitividade e revitalizar a poboación activa no rural, con atención especial ás mulleres.
