Mañá comeza no Centro de Exposicións, Feiras e Convencións de Córdoba o XXVI Congreso Internacional Anembe de Medicina Bovina de España. Nesta edición, e como clave para o progreso do sector, a Asociación Nacional de Especialistas en Medicina Bovina de España (Anembe) escolleu como temática central a sostibilidade. Abordaranse, así mesmo, aspectos relacionados coas emisións de gases de efecto invernadoiro, a xestión de residuos, a saúde de ubre, os novos desafíos e obrigas dos profesionais buiatras, as últimas novidades referentes á nutrición na recría e as actualizacións relativas á reprodución no gando vacún. Para iso, contarán cunha trintena de expertos nacionais e internacionais que, durante os tres días de congreso, ofrecerán máis de medio cento de conferencias técnicas. En paralelo a estas, e como vén sendo habitual, os asistentes poderán consultar o cento de pósters expostos no recinto e asistir á defensa de varias ducias de comunicacións orais.
Afluencia de congresistas nos últimos anos mantívose estable e por riba dos 700 inscritos, boa proba, como sinalan desde a directiva de Anembe, do bo estado no que se atopa a asociación, que nesta ocasión adiantou ao mes de abril a súa reunión anual que, polo xeral, se celebra a finais de maio. Este ano, a cita foi fixada do 24 ao 26 de abril para non solaparse co 32.º World Buiatrics Congress, no que a delegación mexicana tomou o testemuño da española (que acolleu o evento en Madrid en setembro de 2022) e está a ultimar os detalles do evento, que se desenvolverá en Cancún do 20 ao 24 de maio.
