O Club de Xóvenes Gandeiros volve a estar inscrito, un ano máis, na Young Breeders School (YBS) deste ano, que terá lugar os días 31 de agosto e 1 de setembro en Bélxica. Así pois, o clube xa conta con varias prazas reservadas para os mellores manexadores e preparadores dos certames de Santa Comba e Muimenta deste 2024, no marco do campionato puntuable e da liga de preparadores e manexadores que están organizando xunto coa Federación Frisona Galega (Fefriga) e en colaboración con Clun.
Para determinar o gañador da competición sumaranse os puntos obtidos nos Concursos de Preparadores e de Manexadores de Santa Comba, Concursos de Preparadores e de Manexadores de Muimenta (Moexmu) e Concursos de Preparadores e de Manexadores de Feiradeza. Para participar na YBS teranse en conta unicamente os resultados conseguidos nos certames de Santa Comba e da Moexmu; porén, para o final da liga tamén se valorarán as puntuacións de Feiradeza.
